Cofiant Hedd Wyn

Y mae Alan Llwyd yn Athro yn Academi Hywel Teifi, Coleg y Celfyddydau a Dyniaethau, Prifysgol Abertawe. Cyhoeddwyd ei gofiant i Waldo Williams, sef y trydydd cofiant mewn pedwarawd o gofiannau, ychydig fisoedd cyn cyhoeddi’r fersiwn newydd hwn o gofiant Hedd Wyn. Eisoes cyhoeddwyd Kate: Cofiant Kate Roberts 1891-1985 a Bob: Cofiant R. Williams Parry 1884-1956, llyfr a enillodd y categori ffeithiol-greadigol yn Llyfr y Flwyddyn eleni.

Ffrwyth yr ymchwil a wnaed yn wreiddiol ar gyfer sgriptio’r ffilm Hedd Wyn oedd argraffiad 1991 o’r cofiant. Trwy gydol y blynyddoedd oddi ar hynny, bu Alan Llwyd yn darlithio ar Hedd Wyn a bu’n chwilio am ddeunydd a gwybodaeth newydd amdano ef a’i farddoniaeth trwy’r amser.
Mae’r fersiwn newydd hwn yn cynnwys llawer iawn o wybodaeth newydd am Hedd Wyn, fel y llythyr dadlennol a anfonodd o’r Ffrynt at Isaac Davies, Ysgrifennydd Eisteddfod Genedlaethol Birkenhead, ychydig wythnosau cyn iddo gael ei ladd. Beth yn union a ddigwyddodd yn Eisteddfod y Gadair Ddu? Sut effaith gafodd marwolaeth Hedd Wyn ar Gymru ar y pryd?