Plu

Daw Caryl Lewis o Ddihewyd, Ceredigion, ac mae bellach yn byw ym mhentref Goginan ger Aberystwyth. Enillodd ei hail nofel Martha Jac a Sianco, wobr Llyfr y Flwyddyn 2005 a'i nofel i bobl ifanc, Iawn Boi?, wobr Tir na n'Og yn 2004. Cafodd ei nofelau Y Rhwyd a Martha Jac a Sianco eu haddasu ar gyfer y sgrin fach. Mae Caryl hefyd yn ysgrifennu ar gyfer y theatr a theledu a chaiff fwynhad mawr wrth ysgrifennu ei chyfres boblogaidd ar gyfer plant bach, sef cyfres Bili Boncyrs.

Dyma ddeuddeg o storiau cyfareddol sy'n darlunio'r berthynas rhwng dyn a'i gyd-ddyn. Gyda natur yn gefnlen a hwnnw'n newid o dymor i dymor, mae'r plu'n llinyn cyswllt sy'n gwau drwy'r storiau gan oglais a swyno dychymyg y darllenydd.

Llwydda'r awdur i greu darluniau sensitif llawn cydymdeimlad a bywydau a chynefinoedd y Gymru wledig, ac wrth greu delweddau cryno a chofiadwy ceir sawl adlais o'r nofel Martha Jac a Sianco. Dyma gyfrol grefftus arall gan un o awduron mwyaf dawnus y Gymraeg.